2Cor 2 | MMX | STEP | Nia aga doma i do nia noxo vot pasa bok ba nimi at tara tavatpas melemu, kusu a noxo lox abulu nimi.

2 Corinthians 2

1 Nia aga doma i do nia noxo vot pasa bok ba nimi at tara tavatpas melemu, kusu a noxo lox abulu nimi. 2 Mo do ana lox abulu nemi, nege bok ba naba lox amomo ia? La ixo epovo do nia aba lok ka tomomo boro at tara vetpes. 3 Ni lavasuun teren la nia aga malagan mo lovoang petpes tinimi. Agoxopara i do ana vot pasa nimi la ana ruuna ka lainbulu mila nemi vam nom limixin do ri lox amomo ia. Aga nuunu do miba momo eburu minia. 4 Aga malagan mo lovoang tinimi mi langsangan lumumuat la lanteng keneng at lorooro rak la lengkabilidan bok gara sixisu at luxatli rak, la mo levelinga xopmen do ri lox abulu nemi, ketla nia aga malagan i ti lox axasep nemi xusu mina ven kisip labalamu silok tarak tinimi.

Mina Doxoma Xape Laxakapmek At Laradi Ga Lox I

5 Mo laradi xantubu atnimi goxo lox abulu solo ia, ketla neni ga lox abulu aleng lentaba atnemi limixin lotu. La nia axopara i do lumumuat teren na silok solo. 6 Buaang atnemi miga siam mi mo lumumuat neni ga ruuna ka i, la na xap ta go. 7 Ketla mo nga mina doxoma xape laxakapmek teren, la mina su auru i mi levelinga xusu ri lox axatu kaxat bok lodoxoma ren basinge lainbulu la loklox abulubun. 8 Kuren la a sing alolos nemi do mina lox asuusu amu bok mo labalamu atnemi rin. 9 Aga malagan mo lovoang tinemi mumu mun i na. Aga vara i do ana long lenget ka i do mina ronga res ap mo levelinga rak keneng at nom lumumuat la mibang tonga res amisik at levelinga rak. 10 Do nemi mina doxoma xape laxapmek teren, nenia bok aba doxoma xape i; ketla axok pakes ti doxoma xepe laxakapmek teren, ketla i epovo do nia ana lox i xuren kusu ana ru tooro nimi at lemeren ne Karisito. 11 Kerepmo la ne Satan noxo epovo na sar asoogong nedik, mila nedik diklen levendomdoma la leven gugu ren.

Luvuttadi Vavang At Lekabus Maxat

12 Gase aga vot to Troas kusu ana vavang mi Lagale Lavavang mumu ne Karisito, aga long lenger i do Leeme Silok ga suang langas tia ri lok lugugu go. 13 Ketla aga bulu aleng mila nia agoxo ven kora ka netak ne Taitas go. Kuren la aga on basinge di, la agat pas uto Masadonia.

14 Ketla ata tong avukat ti ne Moroa, mo im gomgo amisik tinama at lugugu atnama; anai i lok ngan at lavatpas momo atnema xeneng at ne Karisito ik sak tup mi lavamunepen atnama; la at lekngen nama neni i paase asu Lagale Lavavang at lengkot axap la neni i so misigisigis tinedi dikleklen i. 15 Nedik di ru katling ne Karisito ngan lavanga i so misigisigis ti ne Moroa; la nedi dik lok ka lorooro maxat, la nedi bok dinaba seeve, dim somax i. 16 Tinedi dinaba seeve, di ven kibis lanmet; la tinedi di roo suu, di ven kibis lorooro; kuren la nege i epovo nap kip lugugu at Lagale Lavavang atla i silok aleng? 17 Nema maxo lok ngan nedi mo buaang lentaba di tong asu levelinga at ne Moroa xusu dina lok kaka lempilas. Ketla ma paase asu levelinga at ne Moroa mi luruturun, ma gugu at lemeren ne Moroa ngan lavaanat saxaruki at ne Karisito.